سپریم کورٹ کا نسلہ ٹاور کو ایک ہفتے میں گرانے کا کام مکمل کرنے کا حکم

چیف جسٹس آف پاکستان جسٹس گلزار احمد نے شارع فیصل پر واقع نسلہ ٹاور کو گرانے کا کام ایک ہفتے میں مکمل کرنے کا حکم دے دیا۔
نسلہ ٹاور انہدام کیس کی سماعت سپریم کورٹ (کراچی رجسٹری) میں چیف جسٹس گلزار احمد کی سربراہی میں دو رکنی بینچ نے کی۔ کمشنر کراچی نے عدالت کو بتایا کہ 400 مزدور کام کر رہے ہیں اور نسلہ ٹاور کے 5 فلورز گرائے جا چکے ہیں، جس پر چیف جسٹس نے کہا کہ 400 آدمی لگے ہوئے ہیں اور 400 لوگوں سے ایک بلڈنگ ختم نہیں ہو رہی ؟
چیف جسٹس گلزار احمد نے کہا کہ دنیا میں ایک گھنٹے میں ایسی بلڈنگ گرا دی جاتی ہے، آپ لوگ کیا کر رہے ہیں؟ کمشنر نے لکھا ہے کہ ایس بی سی اے نے رکاوٹ ڈالنے کی کوشش کی۔ کمشنر کراچی نے بتایا کہ اندر سے عمارت کا اسٹرکچر ختم کر چکے ہیں ، صرف باہر سے نظر آ رہا ہے، ہم نے مہذب طریقے سے لوگوں کو روکا ہے
عدالت نے کمشنر کراچی کو تمام سرکاری وسائل بروئے کار لاتے ہوئے نسلہ ٹاور کو گرانے کا کام ایک ہفتے میں کام مکمل کرنے کا حکم دے دیا اور کہا کہ نسلہ ٹاور کی 780 مربع گز زمین ضبط کر لی جائے۔