وفاقی وزراء امین الحق اور فروغ نسیم مستعفی ہوگئے

وزیراعظم عمران خان کے خلاف تحریک عدم اعتماد لانے والے حزب اختلاف اتحاد کے ساتھ معاملات طے پانے کے بعد ایم کیو ایم کے وفاقی وزراء امین الحق اور فروغ نسیم مستعفی ہوگئے۔ میڈیا رپورٹس کے مطابق حکومتی اتحاد میں شامل متحدہ قومی موومنٹ پاکستان کے وفاقی وزراء امین الحق اور فروغ نسیم نے اپنے عہدوں سے استعفیٰ دے دیا ہے ، امین الحق وفاقی وزیر برائے آئی ٹی اور سینیٹر فروغ نسیم وزیر قانون کے عہدے مستعفی ہوئے ہیں ، دونوں نے اپنے استعفے وزیراعظم آفس بھجوادیے ہیں اور امین الحق نے استعفیٰ بھجوانے کی تصدیق بھی کردی ہے۔
خیال رہے کہ پاکستان تحریک انصاف حکومت کی اہم اتحادی جماعت ایم کیو ایم کے اپوزیشن کے ساتھ معاملات طے پاگئے اس حوالے سے دونوں فریقین کا معاہدہ بھی ہوگیا ،جس کے بعد سے وفاق میں مسند اقتدار پر فائز پاکستان تحریک انصاف کی حکومت پارلیمان میں اپنی عددی اکثریت کھوتی ہوئی دکھائی دے رہی ہے۔