ایلون مسک نے اپنا نام تبدیل کر لیا

ٹیسلا اور اسپیس ایکس کے بانی ایلون مسک اپنے عجیب بیانات اور اقدامات کی وجہ سے جانے جاتے ہیں۔ اب انہوں نے اپنا نام تبدیل کرلیا ہے، کم از کم ٹوئٹر کی حد تک۔ ایلون مسک نے ٹوئٹر پر اپنا نام تبدیل کرکے مسٹر ٹوئٹ رکھ لیا ہے۔
گزشتہ دنوں ٹیسلا کے حوالے سے 2018 کی ٹوئٹس پر دائر مقدمے کی سماعت کے دوران ایک وکیل نکولس پوریٹ نے غلطی سے ایلون مسک کو مسٹر ٹوئٹ کہہ دیا تھا۔ بعد ازاں وکیل نے کہا کہ ایسا زبان پھسل جانے کی وجہ سے ہوا مگر عدالت میں موجود ایلون مسک نے مذاق کرتے ہوئے کہا کہ یہ ممکنہ طور پر درست وضاحت ہے۔
انہوں نے ٹوئٹ میں کہا کہ انہوں نے اپنا نام بدل کر مسٹر ٹوئٹ رکھ لیا ہے اور اب ٹوئٹر سے انہیں دوبارہ نام بدلنے کی اجازت نہیں ملے گی۔