Qateel Shifai

مینہ برستا ہے تو دھرتی کی نظر جھومتی ہے
پھول کھلتے ہیں تو گلشن پہ نکھار آتا ہے
لیکن اے جشن بہاراں کے نئے منتظمو
خود فریبی سے کہیں دل کو قرار آتا ہے
تم اگر جشن بہاراں بھی کہو گے اس کو
موت کے گھاٹ یہ دھوکہ بھی اتر جائے گا
باد صرصر کو اگر تم نے کہا موج نسیم
اس سے موسم میں کوئی فرق نہیں آئے گا
یہ گلستاں یہ گلستاں میں سسکتے غنچے
اپنے اعمال کے پردے میں انہیں ڈھانپ تو لو
اقتدار آج بھی سرگرم سفر ہے لیکن
بے نواؤں کے ارادوں کو ذرا بھانپ تو لو
آج انسان کی عظمت نے کیا ہے اعلان
خود فریبی سے کوئی جی کو نہ بہلائے گا
جب تک آرائش گل زار نہیں ہو جاتی
کسی کونپل کسی غنچے کو نہ چین آئے گا
لیکن اے جشن بہاراں کے نئے منتظمو
یہ تماشا ہمیں بے کار نظر آتا ہے
مینہ برستا ہے نہ دھرتی کی نظر جھومتی ہے
پھول کھلتے ہیں نہ گلشن پہ نکھار آتا ہے